拉舒福特请专家疯狂操练　网民：PR冇得输！

曼联前锋拉舒福特冇份入选英格兰国家队，不过今个国际赛期都好唔得闲，社交网不断更新佢喺健身室加操嘅影片，又做Gym又打拳非常落力。据报“福仔”仲请埋专家为佢进行特训，希望可以重振雄风。

拉舒福特上季开始表现插水，据英国《每日星报》报道，佢喺暑假请嚟星级教练赖恩贺柏帮手训练。30岁嘅赖恩贺柏曾经踢过曼联青年军，虽然足球事业麻麻，不过转做私人教练就捞得好掂，般奴费南迪斯、达洛治、艾兰加都系佢嘅客人。

不过，拉舒福特咁勤力加操兼摆上网分享，就有球迷质疑系“做骚”，网民留言：“拉舒福特嘅PR冇得输”、“又话要暂别社交网，但将所有私人训练摆上网”、“其实个个职业球员都系咁练，不过得佢会摆上网”。“福仔”今季稳坐曼联左翼位置，但仍未取得入球。