【官宣】阿迪達續約阿仙奴3年　人工世界第2

英超勁旅阿仙奴周四(12日)宣布，領隊阿迪達正式續約3年，喺北倫敦打吡作客熱刺前振軍心。據報阿迪達獲大幅加薪，新合約年薪高達1,500萬鎊，僅次於曼城嘅哥迪奧拿排世界第2。

阿迪達原本合約明年到期，其實續約早已傾得七七八八，不過阿迪達希望先集中處理轉會、比賽等事，等到今次國際賽空檔先正式續約。阿迪達5年前接任阿仙奴領隊，將原本「高薪低能」嘅陣容全面年輕化，並率球隊重返爭標行列，連續2季聯賽拎到亞軍。阿迪達續約後表示：「非常光榮同興奮，我好幸運可以喺阿仙奴工作，呢度所有人都好有野心，我哋希望比依家更成功。」

據報阿迪達續約後，年薪由原本900萬鎊大幅提升至1,500萬鎊，當今球壇僅次於曼城領隊哥迪奧拿嘅2,000萬鎊年薪，比起馬德里體育會嘅施蒙尼(1,000萬鎊)同皇家馬德里嘅安察洛堤(960萬鎊)更高。