【官宣】阿迪达续约阿仙奴3年　人工世界第2

英超劲旅阿仙奴周四(12日)宣布，领队阿迪达正式续约3年，喺北伦敦打吡作客热刺前振军心。据报阿迪达获大幅加薪，新合约年薪高达1,500万镑，仅次于曼城嘅哥迪奥拿排世界第2。

阿迪达原本合约明年到期，其实续约早已倾得七七八八，不过阿迪达希望先集中处理转会、比赛等事，等到今次国际赛空档先正式续约。阿迪达5年前接任阿仙奴领队，将原本“高薪低能”嘅阵容全面年轻化，并率球队重返争标行列，连续2季联赛拎到亚军。阿迪达续约后表示：“非常光荣同兴奋，我好幸运可以喺阿仙奴工作，呢度所有人都好有野心，我哋希望比依家更成功。”

据报阿迪达续约后，年薪由原本900万镑大幅提升至1,500万镑，当今球坛仅次于曼城领队哥迪奥拿嘅2,000万镑年薪，比起马德里体育会嘅施蒙尼(1,000万镑)同皇家马德里嘅安察洛堤(960万镑)更高。