孫興民被隊友歧視？賓坦古亞面臨停賽12場

英格蘭足總周四(12日)宣布，熱刺嘅烏拉圭中場賓坦古亞，因涉嫌喺電視訪問中向南韓隊友孫興民作出種族歧視，正式被檢控，將面臨最高達12場嘅停賽處分。

賓坦古亞今年6月喺烏拉圭電視台受訪，主持人拜託佢拎孫興民嘅波衫，賓坦古亞就講到：「或者可以拎孫興民是但一個表兄弟嘅波衫，因為佢哋個個望落都差唔多樣。」

呢番言論引起南韓球迷反感，賓坦古亞之後亦公開道歉，認自己玩「低級趣味」，孫興民亦表示接受佢嘅道歉，不過英格蘭足總仍然決定提出檢控。

類似事件英超亦曾出現，5年前曼城球星貝拿度施華曾喺社交網發布一張「朱古力公仔」，話係隊友班捷文文迪嘅童年照，結果被指種族歧視而停賽1場。