夏蘭特好友離世獲准放假　鬥賓福特上陣成疑

曼城前鋒艾寧夏蘭特今季狀態大勇，3輪英超已經入咗7球，不過曼城周六(13日)英超主場對賓福特，呢位挪威前鋒上陣成疑，因為佢嘅最好朋友日前離世，據報領隊哥迪奧拿批准佢放假，畀時間佢收拾心情。

夏蘭特周三(11日)喺社交網哀悼好友艾查離世，據報終年59歲嘅艾查被夏蘭特稱為「叔叔」，兩人感情非常深厚，上年出席金球獎都係結伴亮相，夏蘭特視艾查為「人生導師」。艾查日前因病離世，夏蘭特就喺社交網貼出同艾查喺病床上緊緊牽手相片，哀悼：「你係傳奇！文字唔能夠表達你對我嘅意義、文字唔能夠形容我有幾想念你，多謝你做嘅一切，我哋會再見，安息！」

據報夏蘭特周四(12日)已經返到曼城操練，不過哥迪奧拿就希望愛將可以克服傷痛，所以答應畀佢放假收拾心情，周六對賓福特上唔上陣由夏蘭特自己決定。