反擊！坦哈格寸爆C朗：佢喺好遙遠嘅沙特

葡萄牙球星C朗拿度同曼聯領隊坦哈格一向不和，C朗日前接受里奧費迪南專訪，批評坦哈格話曼聯冇能力爭標，係「缺乏野心」嘅表現。坦哈格周四(12日)喺記者會大反擊，否認指控之外，仲寸爆C朗身處「好遙遠嘅沙特」，自己唔會受呢啲聲音影響。

坦哈格早前返荷蘭為烏德勒支出戰紀念賽，佢受訪嗰陣承認曼聯「距離英超冠軍有好遠嘅路」，C朗喺專訪入面就話曼聯領隊唔應該咁講嘢，就算心入面咁諗，都要話「我哋會盡力嘗試去爭冠」，而唔係直接認輸投降。

坦哈格喺記者會被問到，佢就作出否認：「曼聯贏唔到英超係佢(C朗)講，如果你有留意佢之前嘅文章。C朗依家喺好遙遠嘅沙特，同曼徹斯特相距十萬九千里，每個人都有權有自己嘅意見，冇問題。」坦哈格強調唔會受批評影響：「批評影響唔到我，我知道曼聯依家身處嘅過程、向緊邊個方向走，依家係轉型期，但我哋仍然要贏每一場比賽。」