靜候利物浦續約　雲迪積克留隊機會樂觀

國際賽期間，荷蘭中堅華基雲迪積克透露希望同利物浦續約兩年，等自己可以參加2026年世界盃，據報雲迪積克暫時未有同其他球隊接觸，靜候利物浦開出續約條件，留隊機會樂觀。

利物浦三大主力明年夏天約滿，計有穆罕默德沙拿、華基爾雲迪積克同阿歷山大阿諾特，早前有報道紅軍將會同沙拿開啟續約談判。至於雲迪積克，「轉會專家」羅曼諾報道，該33歲中堅未同其他球會接觸，一切等待同利物浦討論過後先做決定。

現時雲迪積克周薪為22萬鎊，明年回復自由身，據報皇馬對佢感興趣，打算明年1月冬窗出手斟介，雲迪積克按規定可以同其他球隊傾轉會，利物浦不得阻撓。

利物浦換帥後今季成績理想，聯賽3連勝與曼城同分，新帥施洛繼承高普「遺產」令球隊保持好表現，獲得球員認可，據報沙拿對施洛執教感到滿意，雲迪積克亦表示希望續留紅軍兩年，似乎向好方面發展，一切視乎利物浦高層作取態。