夏蘭特、靴斯拿當選英超8月最佳

英超官方周五（13日）公布8月最佳各獎項得主，表現最好嘅球員絕對係曼城嘅艾寧夏蘭特，反而得獎教練就有啲爆冷，唔係帶隊3連勝嘅哥迪奧拿同施洛，而係白禮頓新帥靴斯拿。

夏蘭特今夏唔使踢歐國盃，叉足電踢英超，果然有料到，3場攻入7球，其中對葉士域治同韋斯咸都連中三元，加埋對車路士入1粒，3場波佢射門14次，10次射中框，仲有1個關鍵傳送，當選最佳好合理。

至於最佳領隊其實都算爆冷，事關曼城哥迪奧拿同利物浦施洛都3連勝，但官方就揀咗2勝1和嘅白禮頓嘅靴斯拿，呢位31歲德國籍主帥係英超歷來最年輕領隊，8月戰績分別贏愛華頓同曼聯，同埋賽和阿仙奴，佢今季目標係衝擊前4，志向相當遠大。

另外最佳入球係車路士高爾彭馬，對狼隊一腳靚笠射當選，最佳撲救係阿仙奴門將大衞拉耶，佢對阿士東維拉一記近門神救當選。

坊間有個傳說，就係呢個每月最佳獎項係「邪獎」，得獎人士同相關球隊喺攞獎之後嗰場都會出事，不過咁啱夏蘭特今場告假唔會上陣，曼城會否受影響仲要睇睇。