C朗補時9分鐘「神助攻」　艾納斯驚險保不敗

周六(14日)凌晨沙特職，早前取得職業生涯第900球嘅葡萄牙巨星C朗，今仗食白果，但關鍵時刻仍然發揮重要作用，戰至補時9分鐘，佢頭槌二傳畀隊友射入，協助艾納斯主場驚險逼和吉達艾阿里1比1，力保今季聯賽不敗之身。

C朗日前為葡萄牙出戰歐國聯，射入職業生涯第900球，今場開賽前，會方特別向佢頒發一件900號球衣，祝賀呢位39歲老將實現壯舉。不過，C朗今場腳風唔順，包括主射罰球高出。

至於吉達艾阿里亦星光熠熠，包括由賓福特來投嘅射手艾雲東尼首次披甲，雖然兩位星級射手正面交鋒，但上半場互無紀錄。

戰至57分鐘，吉達艾阿里由中場基斯爾入波打開紀錄，艾納斯傾力反擊，但攻門卻往往失之交臂，眼見即將全失3分嘅時候，補時9分鐘，C朗接應傳中波，頭槌跣後，隊友艾加蘭窄角度起腳，省中對手稍為改變方向入網，扳平1比1。

不過，官方將呢個入波計為烏龍波，變相令C朗失去1次助攻數據，佢各項賽事連續6場入波走勢亦斷纜，艾納斯執番1分，今季3場聯賽取得1勝2和。