艾迪耶美創造3球　多蒙特贏波升榜首

周六(14日)凌晨德甲，多蒙特前鋒卡廉艾迪耶美成為主角，射入2球及1次助攻，協助「蜜蜂兵團」主場以4比2擊敗「神奇球隊」海登咸，暫時升上榜首。

海登咸今季首2場聯賽都贏波兼不失球，加上盃賽，各項賽事一度錄得5連勝，演出令人眼見一亮，但今仗遇上多蒙特，立即打回原形。開賽11分鐘，卡廉艾迪耶美傳畀當耶爾馬倫射入，為「蜜蜂兵團」打開紀錄，僅過6分鐘，卡廉艾迪耶美冷靜射成2比0。

雖然海登咸由皮亞寧加入波追番1球，但卡廉艾迪耶美迅速再建一功，為多蒙特領先3比1完上半場。換邊之後，海登咸獲得12碼，由布魯尼格射入，一度重燃希望。不過，踢到補時，多蒙特亦博到12碼，安利簡恩主射入網，奠定4比2勝局。

多蒙特今季聯賽3戰取得2勝1和，以1分優勢力壓踢少1場嘅拜仁慕尼黑、RB萊比錫，暫時做住一哥。