曼聯又搶小將　睇中「新奧迪加特」

英國富豪拉特克利夫入主曼聯後，積極為球隊推行年輕化，繼今夏收購2位18歲新星蘭尼約路、施高干尼，現時又有新目標，紅魔鬼睇中挪超勁旅洛辛堡嘅17歲中場尼柏，計劃明年1月冬季轉會市場重開後，簽入呢位挪威U21小國腳。

尼柏早於2年前已經升上洛辛堡一隊，並於上年5月挪超入波，以16歲零145日成為洛辛堡史上最年輕入波球員，至於今季已有入5球及9次助攻，表現天才橫溢，因而有「新馬田奧迪加特」之稱。加上尼柏曾於7月熱身賽協助洛辛堡擊敗曼聯，成功吸引紅魔鬼主帥坦哈格注意，早已打算簽入佢。

不過，根據英超規例，外援球員必須年滿18歲，先至可以轉會，意味出生於2006年12月19日嘅尼柏最快要等到明年1月冬季轉會市場，先至可以成「魔」。尼柏只剩下2年合約在身，估計曼聯只需要用1,000萬歐元(約8,650萬港元)就可以買到呢位超新星。