曼聯好消息　「玻璃腳」即將復出

曼聯領隊坦哈格表示，養傷超過1年嘅左後衞杜維爾馬拉西亞復操後，進展良好，有望短期內復出，對於左閘人腳不足嘅紅魔鬼而言，絕對係1場及時雨。

杜維爾馬拉西亞2022年7月由飛燕諾加盟曼聯，成為坦哈格執教紅魔鬼後，首位簽入嘅球員。不過，呢位25歲荷蘭國腳2023年夏天膝部受傷，一直長抖，等到今年7月終於可以步入球場，進行單獨訓練，但之後冇晒消息。

坦哈格透露杜維爾馬拉西亞最新情況：「佢有1季時間冇比賽，需要克服各種困難，佢非常勤力，訓練進度良好，好快可以參加全隊操練，距離重返球場比賽嘅日子，已經非常近。」事實上，杜維爾馬拉西亞有入選歐霸盃球員名單，可見坦哈格仍然對佢寄予厚望。

勞基梳爾養傷之下，曼聯現時靠晒達洛治踢左閘，如果杜維爾馬拉西亞可以復出，無疑能夠增加坦哈格變陣靈活性。