法比加斯獻計　17歲新星可頂替奧迪加特

阿仙奴中場馬田奧迪加特因為受傷，無緣周日(15日)晚英超「倫敦打吡」作客熱刺，兵工廠名宿法比加斯獻計，認為17歲新星華尼利有能力頂替奧迪加特，擔任正選。

現時身為意甲球隊科木教練嘅法比加斯話：「如果阿迪達今場派出華尼利踢正選，我並唔會感到意外，因為佢的確有能力擔正，馬田奧迪加特同迪格蘭賴斯缺陣之下，華尼利臨危受命上陣，有助佢成長。」

華尼利2年前已為阿仙奴上陣，成為球隊史上最年輕披甲球員，亦係英格蘭頂級聯賽史上最年輕上陣球員，佢屬於典型10號仔，可以勝任所有進攻位置，踢法的確同馬田奧迪加特相似。

此外，法比加斯認為翼鋒李安度杜沙特墮後，客串中場位置，亦係一個唔錯選擇。