卡斯米路考慮離開曼聯　割價賣去沙特

曼聯巴西中場卡斯米路在「雙紅會」演出甩轆，可能再無翻身機會，據報「胖虎」考慮離隊，明年1月或夏天轉會，下一站好有可能係沙特。

英國傳媒報道，卡斯米路今夏被曼聯列為可出售球員，但佢本人決定再踢1季，但經過季初災難性演出後情況180度轉變，尤其是對利物浦兩度控甩波導致失守，半場即被換出，加上文路爾烏加迪加盟，卡斯米路自知再留喺曼聯只會長坐冷板，因此考慮離隊。

32歲嘅卡斯米路同曼聯仲有2年約，2022年佢由皇馬轉投曼聯，轉會費7,000萬鎊，周薪高達35萬鎊，不過曼聯已打定輸數，如果卡斯米路願意離隊，就會割價出售，至少可以慳番人工。

卡斯米路下一站最有可能係沙特，畢竟佢人工太高，只有沙特球隊可以承擔，另外沙特有唔少佢前皇馬隊友如C朗同賓施馬，算係有個照應。