馬利斯卡讚辛祖完美　唔知佢同坦哈格啲嘢

車路士在轉會死線最後一刻借用查頓辛祖，明年夏天將以2,000萬至2,500萬鎊買斷，相當抵玩，經過一段時間相處，車路士領隊馬利斯卡大讚查頓辛祖表現完美，並表示唔知道佢同坦哈格發生過咩事。

馬利斯卡表示：「我唔覺得簽入查頓辛祖有風險，我認為佢幫到隊波，我亦唔知佢同坦哈格之間發生過咩事，我只知道呢幾個星期練波，佢表現完美。」

馬利斯卡坦言：「其實簽入查頓辛祖同祖奧菲歷斯之前，我分別傳短訊畀佢兩個，話畀佢哋知『如果唔勤力練習，唔使旨意有得落場』，我傳達嘅信息已經好明確。」

呢位意大利籍主帥認為，查頓辛祖嘅作用舉足輕重：「查頓辛祖嘅作用好大，特別係比賽最後階段，我哋需要佢嘅高品質、耐心同準確性。」