門框救3命！皇馬靠12碼挫皇蘇　安帥：唔配贏

開季狀態一般嘅皇家馬德里，周日(15日)凌晨作客2比0擊敗皇家蘇斯達，不過教練安察洛堤賽後承認球隊「唔配贏」，若非下半場獲得2個12碼，加上門框全場3度「救命」，皇馬呢3分都幾難袋得穩。

兩隊今場互有攻守，不過皇蘇埋門威脅更大，上半場先後有盧卡蘇錫同碧加勁射中楣，換邊後1分鐘再有烏馬沙迪熨射中柱。皇馬大難不死必有後福，58分鐘博到12碼，雲尼斯奧斯祖利亞操刀射入；呢位巴西前鋒75分鐘禁區內被踩跌，今次佢讓基利安麥巴比射入，皇馬得以贏2比0。

皇馬全取3分但表現麻麻，教練安察洛堤賽後表示：「場波好複雜，我哋或者唔配贏波，因為皇蘇踢得好好。皇馬未到100%狀態，但我哋對戰果開心，我哋需要踢出一段連勝走勢，呢個係個好開始。」