球王歸位　美斯復出創造3球

阿根廷球王美斯養傷2個月後，終於喺周日(15日)早上美職復出，並再次扮演救世主，射入2球及1次助攻，協助國際邁亞密主場以3比1反勝費城聯。

美斯喺7月美洲國家盃決賽受傷後，一直缺陣，今仗復出立即擔任正選。開賽2分鐘，國際邁亞密先失波，美斯發揮靈魂人物角色，26分鐘扣過對手，罕有用右腳射門入網扳平。

僅過4分鐘，呢位37歲老將接應佐迪艾巴傳中，第一時間起腳射入反超前2比1。戰至補時，美斯不忘為隊友創造機會，橫傳畀好拍檔蘇亞雷斯射成3比1完場，國際邁亞密取得聯賽5連勝，繼續排東岸榜首。

美斯梅開二度之後，職業生涯累積入840球，僅次於入901球嘅C朗。