卡尼「戴帽」破夏蘭特紀錄　拜仁血洗基爾

周日(15日)凌晨德甲，拜仁慕尼黑作客6比1「血洗」基爾，新帥高柏尼成為球會近6年首個開咧3連勝教練。拜仁今場英雄又係哈利卡尼，佢連中三元兼交出助攻，打破埋艾寧夏蘭特紀錄，成為德甲史上最快「製造50球」球員。

拜仁今場再展恐怖火力，哈利卡尼1分鐘就助攻穆斯亞拿入波，之後佢再演「帽子戲法」，加上米高奧利斯入波同對手擺烏龍，輕輕鬆鬆大勝6比1完場。哈利卡尼今仗獨造4球，歷來35場德甲奉獻40個入波同10次助攻，創下德甲最快製造50球紀錄，舊紀錄保持者係多蒙特嘅艾寧夏蘭特，佢用咗44場先製造50個入球。

高柏尼賽後表示：「今場踢得好好，贏波對球員信心有好大幫助，我哋依家唔會睇積分榜，半場領先4球係理想情況，因為我有機會提早考慮周中嘅歐聯，做出一啲輪換。」拜仁半場已換走穆斯亞拿同基拿比，為周三(18日)凌晨歐聯對薩格勒布戴拿模做準備。