A米開齋大勝　為歐聯鬥利物浦壯聲威

周日(15日)凌晨意甲，AC米蘭主場以4比0大勝威尼斯，今季踢到第4場聯賽終於打開勝利之門，2位新兵尤索夫科芬拿、譚美阿巴謙一齊開齋入波，球隊整體演出大有改善，正好為出戰嚟緊周三(18日)凌晨歐聯主場對利物浦壯聲威。

AC米蘭開季首3場聯賽只有2和1負，令新帥方辛加備受壓力，球隊趁早前國際賽空檔時間進行調整，狀態有所提升，開賽2分鐘，迪奧靴南迪斯左路底線傳中，威尼斯門將祖路蘭失誤，漏咗個波入網。

A米迅速打開紀錄後，得勢不饒人，尤索夫科芬拿接應角球頂入，加上基斯甸普列錫、譚美阿巴謙各自射入1球12碼，上半場29分鐘已經領先4球。

換邊之後，威尼斯中場尼高路斯被逐，更加冇反擊之力，AC米蘭亦留力歐聯，拖慢比賽節奏，維持4比0至完場。

另1場意甲爆出冷門，祖雲達斯作客只能同安玻里打和0比0，連續2場互交白卷失分，祖記將於嚟緊周三(18日)凌晨歐聯主場對燕豪芬。