港超聯　生涯第2度「戴帽」　劉智樂：要孭起班波！

標準流浪周日（15日）在「中銀人壽香港超級聯賽」憑劉智樂上演職業生涯第2次「帽子戲法」，以3比1擊敗港會，「樂仔」表示球隊有多名主力離隊後，將要承擔起更多責任，帶領一眾年輕球員成長。

流浪本季陣容有極大變動，「樂仔」亦被任命為球隊隊長，他表示自己要努力帶領球隊前進，助年輕球員取得進步：「『嘉緯』（林嘉緯）同『均宜』（盧均宜）退役，而伊巴謙同神田夢實就轉會，眨吓眼我就成為隊內年紀最大嘅華人球員，希望幫到大家成長，因為我比較遲先開始職業生涯，嚟到30歲先愈嚟愈突出，所以班仔要珍惜機會，盡快發展潛能。」他續道：「其實大家平時練波，同之前喺熱身賽都踢得唔錯，反而去到正規比賽就比較拘緊，呢點要畀心機改善！」

值得一提，今場為「樂仔」自去季初對深水埗的聯賽後，第2度在職業賽場「戴帽」，他對此感到驚喜：「上季季初因為要幫流浪踢『亞冠盃』外圍賽，所以好早就進入狀態，但今季球隊嚟咗好多新球員，要由頭夾過，好開心咁快就同新隊友產生火花。」