曼聯一場四位後衞受傷　兩人有麻煩

曼聯上場英超以3比0大勝修咸頓，但亦付出沉重代價，4位後衞不約而同出現傷疲問題，中堅利辛度馬天尼斯、右閘馬沙拉奧嘅情況比較嚴重，可能缺陣嚟緊周三(18日)凌晨英聯盃主場對班士利。

曼聯今場3位正選後衞利辛度馬天尼斯、馬沙拉奧、馬菲斯迪歷特都踢唔足全場，後備上陣嘅中堅哈利馬古尼比賽末段亦疑似受傷。賽後馬菲斯迪歷特表示自己只係抽筋，哈利馬古尼屬於皮外傷，兩人問題不大。

不過，利辛度馬天尼斯可能拉傷腹股溝，呢位阿根廷國腳近年經常受傷，難免引起外界憂慮。至於馬沙拉奧腳筋受傷，被換走後直接入更衣室治療，似乎傷勢唔輕。

曼聯本身已有4位後衞域陀連迪路夫、勞基梳爾、蘭尼約路、杜維爾馬拉西亞養傷，如果利辛度馬天尼斯、馬沙拉奧有乜三長兩短，隨時令防線出現人腳荒。