麥巴比欠薪案　PSG面臨被禁止簽人

法甲勁旅巴黎聖日耳門(PSG)因為不滿球星基利安麥巴比自由身離隊，所以拒絕向佢支付餘下5,500萬歐元(約4.75億港元)薪酬，雖然法甲賽會日前下令要求PSG發放欠薪，但會方仍然無動於衷，若然PSG繼續唔出糧，可能被罰禁止喺轉會市場簽人。

據悉基利安麥巴比上周三(11日)率領法律團隊同PSG高層展開談判，法甲賽會嘅法律委員會代表亦有出席，最後法甲賽會要求PSG必須發放欠薪，否則向球會判處「轉會禁令」，但呢間豪門似乎未驚過，繼續拖欠麥巴比嘅人工尾數。

PSG財大氣粗，5,500萬歐元對於球會而言只係濕濕碎，問題係班主艾卡理化條氣唔順，不滿麥巴比辜負佢多年以來嘅厚待，令球會人財兩失，因此扣起薪酬作為報復同補償。不過，法甲賽會搬出「轉會禁令」後，估計PSG最後應該會讓步。

另外，巴黎聖日耳門喺周日(15日)凌晨法甲，憑奧士文尼迪比利梅開二度，法比安彭拿入波，主場以3比1擊敗比斯特，保持4戰全勝，球隊將於嚟緊周四(19日)凌晨歐聯主場對基羅納。