半場神調動　紐卡素兩球世界波反勝狼隊

周日(15日)英超賽事，紐卡素作客狼隊先落後下，領隊艾迪侯域喺半場連換3人，「神調動」後果然有起色，比賽後半段憑兩記世界波反勝2比1，開咧4戰有3勝1和，係球會自95/96球季「基瑾年代」後最佳開季成績。

兩隊今場互有攻守，紐卡素有安東尼哥頓妙射中柱，狼隊就喺36分鐘一次美妙組織，由勒美拿近門射入領先。紐卡素領隊艾迪侯域見勢色唔對，半場一口氣換入祖爾韋洛克、辛度東拿利同哈維班尼斯，75分鐘法比安舒哈禁區外遠射，省中狼隊球員後笠入；5分鐘後哈維班尼斯左路推入中間，禁區頂起腳轟入死角，紐卡素得以反敗為勝。

艾迪侯域賽後表示：「我知道部份球員對冇得踢正選感失望，我嘅調動都係戰術需要，因為每場比賽內容都唔同，今場3個半場入替球員都踢得好，東拿利同韋洛克表現出色，當然仲有入波嘅班尼斯，佢嘅射術係難以置信！」