干地效應！盧卡古1射2傳　拿玻里大勝登榜首

周一(16日)凌晨意甲，拿玻里作客4比0大炒卡利亞里，夏天加盟後首次正選上陣嘅盧卡古，立即交出1入波+2助攻做英雄，帶領拿玻里殺上榜首。恩師干地賽後大讚盧卡古係「異類」，所以教邊隊都會簽佢！

盧卡古由車路士加盟後，上場聯賽後備登場即交助攻，今仗正選亮相更入波兼交2助攻，2次上陣就製造4個入波，不得不佩服「盧卡古+干地」呢對師徒組合嘅威力。由於國際米蘭同蒙沙打和失分，拿玻里大勝4比0後登上榜首。

干地賽後大讚盧卡古：「我喺國際米蘭一直想買盧卡古、喺車路士亦提出簽佢，因為佢係前鋒嘅異類！盧卡古非常高大、身體極度強壯，但同時有好好嘅衝刺力，佢依家仲未去到100%，但已經係球隊嘅根基，.我從來唔會懷疑佢。」