【官宣】拉比奧特終於落班　簽馬賽2年

法國國腳拉比奧特今夏同祖雲達斯約滿後，遲遲未有落班，雖然同曼聯、AC米蘭、土耳其同沙特嘅球會扯上關係，但呢位29歲中場周一(16日)正式加盟法甲勁旅馬賽，雙方簽約2年。

馬賽發聲明證實：「球會宣布同法國國腳拉比奧特達成轉會協議，體測完成後就會簽約。」報道指拉比奧特同意簽約2年，由於佢可以免費轉會，據報之前要求嘅周薪為22萬鎊。

馬賽今季喺意大利教練迪薩比領軍下，夏天簽入格連活特、賀積查治、馬奧比等球星，法甲開季4戰有3勝1和，成績理想。