阿仙奴又傷多件　沙卡鬥曼城上陣成疑？

阿仙奴喺英超作客1比0擊敗熱刺，不過亦付出唔細代價，進攻主力布卡約沙卡喺比賽尾段疑似大腿受傷，要提早退下火線，領隊阿迪達表示未知沙卡傷勢情況，周中歐聯同下場聯賽鬥曼城上陣成疑。

沙卡今場助攻加比爾馬加希斯頂入全場唯一入球，令呢位英格蘭翼鋒今季4場聯賽都有助攻，但佢喺86分鐘突然坐喺場中，一直按住大腿位置，最終被換離場，情況令人擔心。

阿仙奴領隊阿迪達賽後表示：「我唔知咩情況，佢受傷嗰陣我哋啱啱換咗兩個人，傷勢係點我未清楚，只係知道佢唔可以繼續比賽。」

阿仙奴近日已有米基爾馬連奴、馬田奧迪加特受傷，對熱刺賽前又有辛真高加入傷兵名單，阿仙奴嚟緊仲要3日內連續作客阿特蘭大(歐聯)同曼城(英超)，如果沙卡缺陣就好大鑊。