唔啱踢「施洛波」？遠藤航有信心走出雪櫃

利物浦今季喺荷蘭教練施洛執教下，開季成績理想，不過上場聯賽輸畀諾定咸森林就打回原形，其中日本國腳遠藤航盛傳因為踢法唔啱「施洛足球」，慘被打入冷宮，不過遠藤航日前表明會等候機會，自信可以走出雪櫃。

遠藤航上季由史特加盟後，拚勁十足嘅表現獲球迷歡心，但自從施洛上任後，佢更注重防守中場嘅用波同組織力，所以重用賴恩格雲貝治做防中，而且寧願用阿歷山大阿諾特同居迪斯鍾斯客串，都絕少起用遠藤航，今季4場聯賽只係後備上陣過1次，仲要係補時用嚟拖延時間嘅換人，完全被無視。

31歲嘅遠藤航日前表示：「國際賽之後有一連串比賽，我會有機會，冇可能會永遠用11個人，我嘅機會一定會嚟。我依家體能狀況冇問題，訓練非常之好，完全唔擔心。」利物浦周三(18日)凌晨歐聯作客AC米蘭，周六(21日)再喺英超迎戰般尼茅夫。