名宿一語道破：安東尼有2大致命弱點

曼聯巴西翼鋒安東尼馬菲奧斯今季4戰僅上陣1分鐘，似乎已經被領隊坦哈格放棄，傳聞球隊想賣佢去紐卡素，但名宿保羅羅賓遜直言「紐卡素唔會要佢」，更指安東尼有兩個致命弱點，第一係太瘦弱，第二係太慢。

保羅羅賓遜表示：「我唔認為紐卡素會買佢，安東尼係個好球員，不過英超對佢嚟講太困難，佢屬於羽量級，另外佢動作太慢，控球太拖拉，英超節奏對佢嚟講太快。」

佢繼續話：「紐卡素同曼聯屬競爭對手，兩隊目標都係爭入前4，睇到安東尼喺曼聯嘅表現，紐卡素球迷同高層都會認為，安東尼對紐卡素唔會有幫助。」最後保羅羅賓遜認為，安東尼唔適合英超，佢喺荷甲表現突出，或者西甲同法甲會更適合佢。