領軍大敗1比9　尹佩斯：以前對曼聯都試過

前荷蘭射手尹佩斯今季做主帥，執教荷甲球隊海倫芬，點知開季第4場就輸鑊甘，作客1比9大敗於阿爾克馬爾腳下，賽後尹佩斯講番當年踢阿仙奴期間，試過2比8輸畀曼聯，仲話作為職業球員就要面對。

海倫芬上場剛以4比0大勝NAC，以為進攻好勁，今場對阿爾克馬爾就鬥攻，上半場落後1比2，下半場尹佩斯決定變陣，不斷換出進攻球員希望收復失地，但適得其反，對方正正就係把握海倫芬換人後嘅混亂，不停入波，入吓入吓最終再入7球，海倫芬輸1比9。

首季領軍就輸咁大鑊，尹佩斯賽後自我安慰：「我好清楚發生緊咩事，我試過2比8輸畀曼聯，確實唔好受，但作為職業球員，呢個係生涯一部分，亦係成為最好自己嘅一部分，足球係一條不斷試錯嘅過程，最終要做個男人去面對。」

尹佩斯自己鼓勵自己：「我唔會有心理陰影，我班球員都唔會，我哋跌倒之後會再次企番起身。」