曼城聆訊「閉門造車」　一個原因其他球會唔敢反對

曼城被英超賽會控告違反財務規定，涉及控罪達到115條，案件已經展開聆訊，但卻「閉門造車」，唔只聆訊過程保密，甚至舉行地點都冇公開，遭到輿論質疑聆訊公信力。由於起碼有5間英超球會將接受類似聆訊，所以相關球會唔敢要求曼城公開聆訊內容，以免將來自己中「回力鏢」。

英國《每日電訊報》指今次聆訊由3位不開名人士組成委員會主持，現時只係公開聆訊基本規則及曼城嘅違規清單。英國法律界人士認為，聆訊應該公開進行，以確保公平及透明度。

不過，如果要改變英超聆訊規則，就必須獲得最少14間英超球會支持，問題係現時起碼有5間球會面臨類似聆訊，佢哋為保自身利益，相信都唔願意支持公開聆訊，所以就算有唔少英超球會對於曼城聆訊「閉門造車」，感到沮喪，都只能無奈接受。