哈利卡尼「大四喜」　拜仁贏9比2狂創紀錄

周三(18日)凌晨歐聯出現驚人賽果，德甲勁旅拜仁慕尼黑主場迎戰薩格勒布戴拿模，憑哈利卡尼食出「大四喜」，以9比2嘅瘋狂比數贏出，成為歐聯史上首支單場入9球嘅球隊，認真恐怖！

喺高柏尼領軍下全勝嘅拜仁，今仗瘋狂搶攻氣勢驚人，19分鐘哈利卡尼憑12碼入波打破僵局，拉菲爾古里路同米高奧利斯之後各建一功，半場拜仁輕鬆領先3比0。

換邊後客隊閃電連追2球，以為拜仁會亂陣腳，但佢哋就用多6個入球回應，哈利卡尼再入多3球，包括再多2個12碼，而米高奧利斯、利萊辛尼同哥列斯卡都有斬穫，助拜仁贏9比2完場。

拜仁成為歐聯年代，第1支單場攻入9球嘅球隊，哈利卡尼亦累積33個歐聯入波，打破朗尼(30球)紀錄，成為史上最多歐聯入波嘅英格蘭球員。

比利時主帥高柏尼賽後表示：「最重要係拎3分，入9球係好罕見，但好有樂趣，球隊嘅能量好，有正確嘅態度，但今仗只係第1場波，之後要保持呢種水平。」