烏加迪「魔性澎湃」　浴血球場堅持比賽

曼聯喺英聯盃大勝班士利7比0，中場新兵文路爾烏加迪首次擔任正選，表現非常落力，即使被對手踢到腳部流血，仍然堅持比賽，獲曼聯球迷激讚「魔性澎湃」。

文路爾烏加迪當時被班士利中場盧卡干尼嘅鞋底踢中，右腳近膝部位置出現傷口流血，需要離場治理。其後呢位23歲烏拉圭國腳重返球場比賽，鬥心十足，唔少曼聯球迷喺網上發文，大讚文路爾烏加迪，包括話：「唔敢相信烏加迪繼續比賽」、「對球隊充滿熱誠」、「佢就係曼聯最需要嘅人」、「球場上真正勇士」。

雖然文路爾烏加迪今場只係踢咗62分鐘就被換走，但已經成功俘虜一眾紅魔鬼球迷嘅心。