奧迪加特傷勢嚴重？阿仙奴全家福露玄機

阿仙奴隊長馬田奧迪加特早前喺國際賽受傷，時隔超過1個星期仍未有報告，令人擔心佢左腳足踝傷勢嚴重需要長抖。阿仙奴周二(17日)拍攝今季「全家福」，有網民就神探上身發現玄機，指奧迪加特好大機會重傷，17歲小將華拿利隨時要幫手頂上。

阿仙奴周二影團體相，布卡約沙卡同奧迪加特坐喺阿迪達兩邊，不過奧迪加特嘅左腳足踝位置，故意擺咗個足球擋住，大有「此地無銀」之嫌。奧迪加特上星期左足踝嚴重拗柴，腫到連磁力共振都做唔到，網民估計佢係仲未消腫，連波砵都着唔到，所以要咁突兀用個波擋住。

今次「全家福」亦有驚喜，4名小將正式被提拔上一隊，當中包括夏天由阿積士加盟嘅英格蘭U19門將錫福，而最受注目嘅係17歲中場華拿利，呢位英超史上最年輕上陣球員，被視為奧迪加特接班人，上場聯賽作客熱刺亦有後備落場，周中歐聯作客阿特蘭大好可能再有上陣機會。