入「廠」唔成　盧卡文要令阿迪達後悔

傳盛阿仙奴主帥阿迪達今夏想收購阿特蘭大翼鋒盧卡文，但最後不了了之，兩隊將於周五(20日)凌晨歐聯交鋒，呢位26歲尼日利亞國腳豪言，已經準備好畀兵工廠見識佢嘅厲害。

盧卡文過去2季意甲入波都達雙位數，上屆歐霸盃有5球進帳，包括決賽上演「帽子戲法」，成為捧盃大功臣，並傳出阿仙奴計劃以4,200萬鎊(約4.3億港元)收購佢，但最後貪平，向車路士借用史達寧。

盧卡文本身喺英國出世，曾經效力愛華頓，代表過英格蘭U19至U21小國腳，2年前轉為代表尼日利亞大國腳，佢對於未能重返英超，並唔感可惜，反而更加激勵佢要擊敗阿仙奴嘅決心：「阿仙奴係強隊，要贏佢哋並非易事，但我哋已經準備好，我哋會證明自己可以喺歐聯立足。」盧卡文上場意甲入1球及1次助攻，協助阿特蘭大以3比2擊敗費倫天拿，狀態大勇，勢必成為阿仙奴防線心腹大患。