C朗真正傳人　加拿祖今季創造7球多過麥巴比

曼聯喺英聯盃大勝班士利7比0，翼鋒阿歷真度加拿祖射入2球及2次助攻，加上社區盾入1球，英超入1球及1次助攻，換言之，呢位20歲阿根廷國腳今季各項賽事，已合共創造7球(射入4球及3次助攻)，仲多過皇馬巨星基利安麥巴比。

眾所周知，麥巴比同加拿祖都視C朗為偶像，兩人甚有呢位葡萄牙巨星嘅影子，麥巴比今季為皇馬上陣7場入5球，並冇助攻。至於阿歷真度加拿祖為曼聯6次披甲，包括社區盾射入曼城大門，英超開鑼戰對富咸，貢獻1次助攻，上輪聯賽對修咸頓入1球，今場英聯盃更加一口氣創造4球。

值得一提，加拿祖對修咸頓，突然做後備，當時傳出佢疑似因為「讚好」C朗批評曼聯主帥坦哈格嘅網上貼文，而被打入冷宮，事後坦哈格澄清屬於戰術安排，加拿祖今場英聯盃，以行動證明自己係不可動搖嘅主將。