日本3星交足貨　些路迪大勝創紀錄

蘇超勁旅些路迪喺周四(19日)凌晨歐聯，主場5比1大破斯洛伐克球隊施洛雲，創下球會歷來歐聯(正賽)最大勝仗紀錄。日本3星古橋亨梧、前田大然同旗手怜央分別有入波同助攻，成為些路迪歷史性一役嘅英雄。

些路迪今場有3名日本國腳正選上陣，上半場靠史基爾斯入波領先1比0。換邊後些路迪大爆發，古橋亨梧47分鐘近門射入，安祖斯56分鐘操刀12碼射成3比0，施洛雲4分鐘後破蛋，但前田大然接應旗手怜央直線建功，再為些路迪建立3球優勢，加上阿當伊達完場前入球錦上添花，為些路迪湊成5比1大捷。

今次係歐聯史上，首次有2名日本球員為同一球隊入波，領隊羅渣士賽後表示：「喺歐聯大勝唔係一件常見嘅事，我冇得要求更多。呢班球員非常無私，互相幫助對方入波，無論傳送同攻門都有好高嘅水平。」