熱刺絕地反勝　「第2季捧盃論」有價講

周四(19日)凌晨英聯盃第3圈賽事，熱刺面對英冠球隊高雲地利幾乎出事，要去到完場前2分鐘先至逼和對手，再喺補時神奇絕殺，作客反勝2比1晉級，領隊普斯迪高路嘅「第2季捧盃論」仲有價講。

熱刺上場聯賽輸畀死敵阿仙奴，英超開咧4場只得4分，不過普斯迪高路就豪氣發出：「我執教球會第2季多數有冠軍」嘅霸氣言論，今仗賽前再次強調：「我只係講事實，有得罪人咩？」

英聯盃被視為熱刺最有機會捧盃嘅賽事，但今場作客高雲地利表現差勁，63分鐘更落後0比1，去到88分鐘先由迪積史賓斯追平，補時2分鐘再由比蘭莊臣上演「絕殺」。

普斯迪高路賽後表示：「熱刺嘅問題唔可能一朝解決，一場波唔會有咩改變，今場球隊展現出季初缺少嘅鬥志，或者呢場反勝會令球隊更有自信。」