英格蘭新星救駕　多蒙特捧紅「辛祖2.0」

德甲勁旅多蒙特今夏放棄收購英格蘭翼鋒查頓辛祖，原來佢哋早有後着，今季成功捧紅20歲新星比諾基頓斯，呢位英格蘭U21翼鋒周四(19日)凌晨歐聯，後備上陣連入2球，協助「蜜蜂兵團」作客3比0大勝布魯日，今季只係踢180分鐘就有4個入波，前途無限。

多蒙特今場作客布魯日主導戰局，不過面對主隊頑強防守就冇晒計，比諾基頓斯68分鐘後備登場改變戰局，76分鐘佢喺左路扣大位起腳省中人入網；86分鐘比諾基頓斯再喺左路發難，幾下插花後推入中路射入遠柱，多蒙特補時再有古拉斯射入12碼，大勝3比0完場。

比諾基頓斯同查頓辛祖一樣喺曼城青訓出身，早喺4年前就被多蒙特挖角，今季終於出頭，上月底德甲對法蘭克福，比諾基頓斯又係後備上陣梅開二度，帶領多蒙特2比0贏法蘭克福，今場再次成為「後備殺手」。

20歲零41日嘅比諾基頓斯，今場後備上陣入2球，係歐聯史上第2年輕後備上陣入多過1球球員，僅次於1997年摩納哥嘅查斯古特(20歲零7日)。