夏蘭特歐聯大跌Watt　拒換波衫「笑住鬧交」

曼城喺歐聯主場0比0悶和國際米蘭，開季喺英超大殺三方嘅艾寧夏蘭特，全場受到國米嚴密看管慘食白果。統計顯示，夏蘭特近13場歐聯有9場入唔到波，對住皇馬、國米等勁旅就「腳軟」，大賽表現不穩問題仍有待解決。

夏蘭特今場被國米3中堅巴斯東尼、法蘭斯高阿沙比、恩比錫克輪流招呼，全場只得14次掂波，就連最強嘅身體對抗，6次爭波亦輸咗4次。夏蘭特近13場歐聯，只係喺對年青人(2次)、哥本哈根同RB萊比錫3隊入過波，當中2鬥國際米蘭、4鬥皇家馬德里就全部交白卷。

心情麻麻嘅夏蘭特，完場後更同法蘭斯高阿沙比出現爭執，夏蘭特投訴對手經常出茅招拉衫，阿沙比反而要求夏蘭特送2件波衫畀佢，「唔知好嬲定好笑」嘅夏蘭特就笑住爆粗：「死X開！」夏蘭特依家喺曼城累積入99球，仲差1球就可以達到100球里程碑。