雙星復操隨時候命　曼聯要爆啦！

近期狀態回勇嘅曼聯，周日(22日)凌晨作客水晶宮前再有好消息傳出，因傷缺陣多時嘅美臣蒙特同海倫，喺星期三(18日)操練強勢回歸，如無意外可以候命上陣。

開季場場正選嘅美臣蒙特，上月底因大腿受傷倦勤，原本估計可能要抖5個星期，不過呢位英格蘭中場極速康復，周三已經重返練習，而同場仲有季前熱身受傷，今季未上過陣嘅丹麥前鋒海倫，據報兩人將可以喺對水晶宮一仗候命。

曼聯近期大爆發，先喺英超3比0大勝修咸頓，周中英聯盃再以7比0狂數班士利，兩場比賽轟入10球，依家再有美臣蒙特同海倫回歸，火力必定更加恐怖！