曼聯放棄保留奧脫福　清拆計劃年底拍板

曼聯興建新球場計劃即將落實，據英國《每日郵報》報道，新老闆拉特克利夫將會放棄保留已有114年歷史嘅奧脫福球場，若果20億鎊興建新主場「北溫布萊」嘅計劃拍板，奧脫福球場會被全面清拆。

曼聯喺夏天公布喺奧脫福旁邊興建「北溫布萊」嘅計劃，原本球會希望將奧脫福「改細」，由依家嘅75,000座位縮到3萬座位，畀曼聯女子隊同青年軍作為主場。不過曼聯經考慮後，認為保留奧脫福嘅計劃耗資巨大，依家屬意全面清拆，並會成立關注組，研究點樣保留奧脫福入面具有歷史價值嘅物品，包括悼念慕尼黑空難嘅時鐘同隧道、紀念卜比查爾頓、丹尼士羅及佐治貝斯嘅銅像等等。

要將承載曼聯歷史同傳統嘅奧脫福清拆，肯定會引起球迷反對，不過作為曼聯新球場工作組一員嘅加利尼維利，就認為呢一步係必定要行：「我喺1979加入曼聯，當時嘅看台其實已經冇晒，依家嘅看台都係喺1993年至2005年間新起，我哋冇可能將所有過100年嘅嘢全部保留。」