「無主奇兵」比斯特121年首戰歐聯即贏波

周五(20日)凌晨歐聯，比斯特成立121年以來，首次參賽歐聯正賽，即使未能喺主場比賽，都無阻佢哋創造歷史，旗開得勝，以2比1擊敗格拉茨，成為今屆賽事最大奇兵。

比斯特上季爆冷獲得法甲第3位，可以直接進入歐聯正賽，但由於原本主場只能容納1.5萬人，唔符合歐洲足協規定，今仗「主場」惟有借用法乙球隊甘岡嘅球場。

雖然比斯特地利優勢受削弱，但並冇影響球員發揮，開賽23分鐘由中場曉高麥列堤遠射入網打開紀錄。不過，上半場補時，另1位中場艾迪美臣費南迪斯擺烏龍，導致被格拉茨扳平。

換邊之後，艾比達拉施馬轉身抽射入網，為比斯特奠定2比1勝局，寫下球會歷史重要一頁。由於比斯特今季聯賽表現欠佳，4戰只有1勝3負，一般相信難以參加下屆歐聯，球員更加要把握今屆千載難逢嘅機會，好好享受踢呢項大賽。