超越莫高高！阿仙奴14歲小將創歐聯紀錄

阿仙奴喺歐聯首仗作客只能悶和阿特蘭大，佢哋嘅小將亦喺歐洲青年聯賽(U19歐聯)慘敗，1比4輸畀阿特蘭大U19，不過阿仙奴14歲天才麥斯杜文就創造歷史，打破德國前鋒尤素法莫高高紀錄，成為歐洲青年聯賽史上最年輕入波球員。

喺2009年12月31日出世嘅麥斯杜文，係阿仙奴重點栽培嘅新人，14歲仔就跳班踢U19歐聯，今場首次擔正即入波，以14歲8個月零19日之齡，打破多蒙特前鋒尤素法莫高高(14歲11個月零3日)紀錄，成為呢項賽事最年輕入球者，喺呢個榜上面嘅人唔少都成功上位，包括效力里昂嘅法國新星卓基(第3位)、利物浦中場賴恩格雲貝治(第6位)同AC米蘭前鋒卡馬達(第7位)。

司職進攻中場嘅麥斯杜文，今個月初入選英格蘭U17國家隊，首次上陣就入波協助英格蘭U17以5比0大炒墨西哥U17，前途無可限量。