列斯占士復出無期　明年1月或被出售

車路士後衞列斯占士嘅傷勢康復情況未如理想，需要進一步延遲復出，至於幾時可以上陣，仍然係未知之數。據悉車路士管理層已經對呢位24歲英格蘭國腳失去耐性，計劃明年1月轉會市場重開後出售佢。

列斯占士雖然有份參加季前熱身賽，但其後因為腿筋受傷，一直缺陣，今季英超仍未曾披甲。最新消息指，軍醫需要更多時間觀察呢位右閘嘅康復情況，估計短期內無法復出。

列斯占士曾經多次出現腿筋受傷，合共缺陣接近200日，加上其他傷患問題，早已成為車仔「最容易受傷的男人」，近2季英超分別只曾上陣16次同10次，所以會方打算放棄呢位「玻璃腳」，等明年1月轉會市場重開後，只要有合理報價，就會出售佢。

早前曾傳出皇馬有意簽入列斯占士，作為丹尼爾卡華積嘅接班人，但現時見佢長抖，恐怕會打退堂鼓。