前球證自爆同美斯「交易」？唔罰黃牌換波衫

美斯用波衫換球證手下留情？智利前球證真迪亞近日接受訪問，自爆喺2007年美洲盃4強賽事，同美斯喺球場上「傾掂數」，要美斯用波衫換取真迪亞「鬆手」唔出示黃牌，令佢唔需要喺美洲盃決賽停賽。

真迪亞所講嘅比賽係07年美洲盃4強，當時阿根廷領先墨西哥3比0，賽事亦進入最後幾分鐘，點知美斯突然喺中場犯手球，如果佢拎黃牌就要喺決賽停賽。真迪亞表示：「我同美斯講，呢一下係要罰黃牌，除非你畀件波衫我。」呢單「交易」最後順利達成。

真迪亞表示：「美斯賽後喺更衣室畀件衫我，其實佢原本喺球場上已經剝畀我，但我話唔好依家畀，留番喺更衣室先畀，佢就拎件衫去更衣室畀我，美斯件衫依家由我個仔保存。」真迪亞喺決賽未有執法，佢就話係同呢單交易有關：「我覺得因為我冇罰美斯黃牌，巴西方面肯定嘈過，所以我先冇份吹決賽。」雖然阿根廷有美斯壓陣，但巴西喺決賽仍然贏3比0捧盃。