米蘭打吡決定方辛加命運　A米想請杜曹執教

AC米蘭今季請來方辛加執教，成績不進反退，4場聯賽只有1勝2和1負，上場歐聯主場1比3不敵利物浦。根據意大利傳媒爆料，如果AC米蘭下周一(23日)凌晨意甲「米蘭打吡」輸畀國際米蘭，就會解僱方辛加，首選邀請前拜仁慕尼黑主帥杜曹接手執教。

據悉AC米蘭管理層已有4位新帥候選人，包括杜曹、前拉素教練沙利，前祖雲達斯教練阿里基、前多蒙特教練泰錫。A米大股東RedBird Capital Partners傾向聘請1位世界級名帥領軍，首選杜曹，因為佢教過多蒙特、巴黎聖日耳門、車路士、拜仁慕尼黑，奪得法甲、德甲及歐聯、世冠盃冠軍等重要錦標，最符合「世界級名帥」要求。

AC米蘭已經派人同杜曹聯絡，並提出明年1月轉會市場重開之後，斥巨資畀呢位51歲德國名帥增兵，吸引佢加盟。杜曹正在考慮之中，而且都要睇埋AC米蘭對國際米蘭賽果之後，方辛加是否被炒，再作決定。