玩電動滑板車被罰19萬韓圜　連格：以後唔玩

早前報道前曼聯球星連格在首爾街頭玩電動滑板車，仲上載片段到社交平台留下罪證，結果被當地執法人員斷正，罰款19萬韓圜(約1,100港元)，事後連格公開道歉，仲話以後唔會再玩。

據報連格今次總共被控多條罪，計有冇戴頭盔、無牌駕駛電動滑板車、逆線行駛等，罰款19萬韓圜。相對於去年佢喺英國醉駕，被罰款5.7萬鎊(約57萬港元)，今次罰款輕到可以唔提。

不過連格都識大體，事後仍然道歉，在社交平台留言：「我冇查過南韓法例，唔知呢度玩電動滑板車要戴頭盔，喺英國同歐洲，你可以喺大街小巷隨意玩電動滑板車，但嚟到南韓，就要睇吓法例，咁做（玩電動滑板車）有一定危險，對每個人嚟講安全第一，所以我唔會再玩，並公開道歉。」