曼城好消息　迪布尼可復出鬥阿仙奴

曼城收到好消息，上場歐聯受傷嘅中場核心奇雲迪布尼，已經冇大礙，領隊哥迪奧拿表示，呢位比利時國腳有望出戰周日(22日)晚英超榜首大戰主場對阿仙奴，可增添「藍月亮」勝算。

曼城上場歐聯主場對國際米蘭，奇雲迪布尼疑似鼠蹊受傷，踢完上半場就退下火線，一度傳出佢可能缺陣對阿仙奴。大戰前夕，哥迪奧拿派定心丸，透露呢位33歲老將可以披甲：「奇雲感覺已經好番唔少，但未算100%痊愈，佢有機會上陣對阿仙奴，大家拭目以待。」

奇雲迪布尼今季英超上陣4場入1球及1次助攻，佢嘅組織力及傳送，直接影響射手艾寧夏蘭特發揮，呢位中場大腦能否上陣，對於曼城爭勝非常關鍵。