伊沙克受傷　1位奇兵成紐卡素搶分關鍵

紐卡素前鋒阿歷山大伊沙克上場英超對狼隊，不幸整傷腳趾，預料無法出戰周六(21日)晚英超作客富咸，加上另1位射手哥林威爾遜仍在養修，領隊艾迪侯域今場可能焗住用翼鋒安東尼哥頓客串中鋒位置，「後備殺手」哈維班尼斯有望擔正。

阿歷山大伊沙克上仗踢完上半場就退下火線，事後證實腳趾受傷，上陣對富咸嘅機會唔大，英國《每日郵報》指艾迪侯域已經有兩手準備，一旦阿歷山大伊沙克缺陣，就會用左翼安東尼哥頓頂替佢嘅位置，然後派出哈維班尼斯出任正選左翼。

值得一提，哈維班尼斯今季4場英超只有1場擔任正選，另外3場後備上陣，但仍然交出亮麗數據，包括射入2球及1次助攻，如果佢今場擔正，隨時可以帶來驚喜。