咩玩法？愛華頓想簽迪利阿里打護級戰

愛華頓今季英超4戰全敗，被指好大機會降班，根據英國傳媒報道，球會總監菲維爾有意簽番現時正在跟操嘅自由身球員迪利阿里，似乎想搵呢位28歲英格蘭中場幫手打護級戰。

迪利阿里近年事業直插谷底，2022年1月由熱刺轉投愛華頓後，愈踢愈沉，2022/23年球季被外借去土耳其球隊比錫達斯，一樣冇起色，僅上陣13次，上季因為受傷及場外問題，冇為愛華頓上陣。

迪利阿里今夏約滿後，仍然獲準留隊跟操同進行康復治療，愛華頓總監菲維爾近日透露，唔排除向迪利阿里提供新合約，至於會唔會成事，需要根據佢嘅身體狀態而定。

不過，唔少網民都睇淡迪利阿里復出前景，甚至指愛華頓一旦簽番佢，絕對係「自殺式」決定，下季英冠見。